السبت، 17 أكتوبر 2009

عربي اصيل

من فتره ذهبت انا وزوجي واخت زوجي وزوجها والاولاد على مطعم عربي في دير بورن كانت هناك ملاحظات
اول شي جابه المخللات ومن ثم جابه صحن خضار والخضره فيه مش مقطعه ولا شي المفروض يكون شكل من اشكال السلطه يعني حاطين خيارتين وبندوره كبيره وخسه وبصل اخضر تقول انه الناس اللي بتيجي خرفان .....
وبحكم معنا اطفال وبتعرفوا انهم ما بيحلالهم يروحوا على الحمام الا انت وقاعد تاكل طبعا رحنا على الحمام اللي شكله من سنين مش نظفينه وقرفت حاله يعني اللي بيشوف المطعم بتهيأله انه ما في احسن بس الحمامات بتقرف !!
طبعا اجا الاكل واكلنا وطبعا اكلهم زاكي والحمدلله واحنا بناكل خير اللهم اجعله خير بتشوف رجال قام من الكرسي تبعه وحاطت الفوطه في بنطلونه وعاملها متل المريله وماشي الافندي ولا عباله يعني والله هاد منظر انت بتفكر حالك وين !!
الامر الاخير اللي لفت انتباهي هو انه الافندي الجرسون جاب الرصيد وحاطينه في غلاف خاص ومن المعروف انه الزبون بيحط الفيزا كارد او الفلوس وبيجي ياخذها ليعرف انه اذا الزبون دفع بالكاش او الكارد متل زوجي طبعا وقعدنا نستنى اكثر من 10 دقايق والجرسون رايح جاي متل ام العروس مش عارف شو بده يعمل طبعا اخذني المخ العربي ورحت على الكاشير وباحكيله صار النا اكثر من 10 دقايق نستنا حكالي يا اختي احنا منحط الغلاف هناك من شان لما تطلعي تيجي وتدفعي هون !!! طبعا انا فتحت عيني التنتين باوسع ما اعطاني الله وحكيتله يعني قاعد تستخدم هاي الطريقه الحديثه باسلوب القديم !!حكى احنا هيك
لو يعيش العرب في الغالم الغربي مليون سنه بالكم رح يتغيروا يمكن اللبس والشكل بس فكرهم بيضل عربي اصيل !!

هناك تعليق واحد:

Amjad Wadiِ يقول...

انا لأكثر اشي بكيف على المطاعم العربية اول ما يفتحوا .. بتكون الخدمة سوبر خصوصا اذا عرفوا الشخص .. بس لأسبوعين أو شهر على الأكثر .. بعدين النوعية بتصير كثير سيئة والسعر بزيد .. وحتى طعم الأكل بصير مختلف