الثلاثاء، 3 مايو 2011

ما هو ثور !!

لما تحس انك بدك تكون لحالك ولما يكون اللي حواليك مش فاهمينك وبتوقعوا منك كل شيء ولما يكون الصبر خالص بيره من وين بدك تحط فيه ولما يكون الكل في واد وانت في واد شو بدك تعمل
لما التعب يكون نصيبك في كل يوم ولما يكون قلة الاحساس شعار وقلة الفهم منار شو بدك تعمل !!
لما يكون اللي قدامك حيطه وانت تشرح وتشرح وتلاقي الدان متل ما يدخل ويخرج منها شو بدك تعمل لما تتعامل مع ناس على انهم شيء قريب وتكتشف من ورا ظهرك في حكايات وقصص !!
لما يكون اللي قدامك متل الكاس الفاضي وانت عطشان ومش ملاقي شو بدك تعمل !!
لما يكون اللي قدامك بتوقع كل شي يمشي بسهوله وما في تعكير ولا تعب حتى لو حطوك في ساقيه وينسى انك انسان وفي يوم تحتاج فيه راحه وامان شو بدك!!
لا تسألوني شو مالي لاني تعبانه وقرفانه حالي وحاسه حالي رح افقع !!
تطلع حوليك بتلاقي ناس عايشه واللي بدهياه بين ايديها ييجي ركاض وانا اللي قبلانه في الهم حتى كلمة حمد ما فيه وما حدا يحكي لي انه في ناس ازفت من حالتي وانه لازم احمد ربي حمدنا وشكرنا لكني بشر وطاقة تحمل وصلت الصفر يعني لمتي الاستخفاف في كل شيء بيخصني ولازم احترم واقدر وفشي احترام لاي شي بيخصني
ولما تحكي للمتخلفين اللي حوليك هاد ثور ويحكولك بدنا حليب شو تعمل !!

هناك 10 تعليقات:

yosef يقول...

صباح الخير

معلش بدك تتحمليني شوي وما تزعلي مني لاني هاي الحالة انا اكثر من عانى منها واعرف اسبابها

اول شيء الحق عليكِ لانك انتِ تعودت ان تكوني في حياتك الحراث...نعم دوما هناك حراث يّحرث عليه وعادة هذا الحراث يُستغل من الجميع وفي كل الازمنة والفترات

انا اكتشفت يا سوزان انه لا يوجد في هذا العالم من يكتشف انك قادرة على العطاء الا ويستغل تلك الخصلة بدلا من ان يقدرها

لذلك الخلل فينا وليس فيهم
فنحن من اخترنا هذه الطريق وعلينا ان ندفع ضريبة التزامنا بها وعليك من الآن ان تحاولي ان تقتنعي ان من المستحيل ان تتغيّري وتصبحي كالآخرين وانه من الصعب على الآخرين ان يتغيّروا ويفهموا ان سبب عطائك وقبولك مبدأ ان تكوني الحراثة هو ايمانك بالعطاء وليس غباءاً منك او سذاجة لا سمح الله

طيب شو الحل؟؟
عليكِ بالاعتكاف قليلاً مع الهدوء والصمت وفكري فقط ...هل انت سعيدة بما تقومين به؟؟؟ وضعي امامك صور كثيرة لمن لا يفهمك ولا يفهم ما تقومين به وحاولي لن تتصوري نفسك مكانهم ...هل كنت ستكوني راضيّة عن نفسك؟؟؟

واخيرا اقول لك ان كل خطوة ناجحة تقومين بها في حياتك ستزيد من معاناتك وستجلب لك الكثير ممن يحاربون هذا النجاح كل بطرقه المحتلفة

سانصحك اليوم وبعد ان توصلي عبودة ولولو الى المدرسة اذهبي الى الحديقة وتمشي وحدك.....لساعة او اكثر على الاقل
فكري ...هل انتِ راضيّة عن نفسك؟؟؟

الله يرضى عليّك ويسعدك

نيسآان يقول...

سوزان
انا بمرق بهذه الحاله اللي حكيتي عنها كتير فاللي بقدر اقوله انك بحاجه لاجازه ....حاولي بكل ما اوتيت من قوه انك تيجي لعمان تشوفي اهلك وامك واخوانك ولو ما قدرتي حاولي انك تاخذي اجازه اجباريه وانتي في بيتك....تبعدي عن كل الاجواء اللي بتسببلك ازعاج وضغط وتختصري كتير من الالتزامات والواجبات وتقللي النقاشات اللي ما في منها نتيجه او فايده ....واللي مش عاجبه يبلط البحر!!!

الله يكون معك دائما يقويك ويحميكِ ويفرجها عليكِ.

Whisper يقول...

حبيبتي
فتره و بتمشي ان شاء الله


للاسف الناس بطبعها اناني فاي انسان طبيعته معطاءة بلا حدود بنصدم بان عطاءة صار حق من حقوق اللي حواليه و برضه بصيرو بدهم اكتر

انا نصحتك بهالنصيحه من قبل و بعرف انها صعبه بس حاولي تعمليها

اتركي كل شي و احكي للي بالبيت انا طالعه و برجع بعد ساعه او ساعتين
اتركي كل شي و كل اللي بالبيت و خدي وقت الك من فتره لفتره هيك بس بقدرو و بعرفو الفرق ونعمة وجودك بالبيت و بينهم

ان شاء الله تكوني هلأ احسن يا قمر

w7l يقول...

و الله بصراحة مش عارف شو بدي احكي! يعني التعليقات اللي فوق كفاية ، بس يمكن هاد الشعور اشي مؤقت ، يمكن بكرة تشوفي شغلات راح تفرحك و تخليكي تنسي اللي كتبتي هون، الدنيا مرة الك و مرة عليك !

طنشي احسنلك!

كريمة سندي يقول...

الله يعينك تقبلي مروري

sozan يقول...

اهلين استاذ يوسف:)
انا هلا احسن الوضع اخف صرت اطلع لحالي وامشي فخففت من حدة الاشياء اللي حوالي وانا فعلا اخذت بالنصيحه وعملت تقييم لنفسي واشكرك جدا

sozan يقول...

اهلين نيسان:)
انا الحمدلله اخذت اجازه والي فتره مش مسؤوله عن شي غير القراءة الشي الوحيد اللي بيخفف من وحدتي
شكرا كتير نيسانة التدوين!

sozan يقول...

اهلين حبيبتي ويسبر:)
انا الحمدلله منيحه هلا والي فتره ماخده اجازه من كل شي حتى من التدوين :(
لكن الحمدلله النفسيه افضل وشكرا كتير الك

sozan يقول...

اهلين دكتورنا :)

انا فعلا هلا احسن وخاصه اني لقيت كتير والحمدلله ناس تسأل وتقدم النصائح
شكرا كتير

sozan يقول...

اهلين كريمه سندي :)
اهلا فيكي في المدونه وبيرحب فيكي في عالمي الصغير :)
الله يخليكي يارب وبشكرك كثير تقبلي احترامي وشكرا