الاثنين، 18 أكتوبر، 2010

شحه في الذكور




اليوم قرأت على الاخبار ولد اسمه خالد وحيد اهله والاب كان يستنى بهالحيله من زمان لما الله اعطى الولد نذر لرب العالمين انه يخطب اله وهو عمره 5 ويجوزوا على 13 .
طبعا الولد عمره هلا 5 سنين وبيروح على الروضه والام على سلامتها يعني بتحكي والله كنا ندور على بنت الحلال ليوم رحنا على اللاذقيه وكان النا قرايب هناك عندهم بنت والولد ما كان يلعب مع حده الا معاها لحد انه في يوم لبسها الكندره حتى تحمي رجليها من حر رمال الشط!!ولما رجعوا الولد بطل ياكل ويشرب وصار يسأل عن البنت ويطالب اهله انهم يخطبوها اله.طبعا السخافه ما وقفت هون استمرت لحد انهم راحوا خطبوا البنت ولبسوها الخاتم!!!
طبعا هي اسئله خطرت ببالي هلا ممكن افهم شو معناة بنت حلال عن بنت عمرها 5 او 4 سنين هاد اولا وثانيا الولد شو بيعرفوا بالحب بين الجنسين وشو بيعرفوا انه علاقته مع البنت لازم تتوج بالزواج وهو في سن لساته بيلعب في سياراته البلاستيك!!والشي اللي ما خرط مخي انه كيف اهل البنت وافقوا هو في شح في الولاد او عفوا في الذكور !!
من شان الله ارحمونا من هالبلاوي يعني اذا الله اعطاك نعمه ما بتعرف كيف انك تحافظ عليها ؟
والانيل من كل النيله هاي اللي قرأته عن فتاة سعوديه تبلغ من العمر 40 عام طبعا هي طبيبة جراحه وحضرة جناب الاب رافض انه يجوزها ومش بس هيك بيسيء معاملتها بالضرب والاهانه.
فالبنت لجأت الى ملجا الحمايه اللي عايشه فيه الها 5 سنين حتى ينظروا في قضية العضل اللي هي رافعتها من اجل رفع الولايه عن ابيها حتى تستطيع تزويج نفسها لكن القاضي المحكمه المدنيه رفض القضيه معتبر البنت عاقه لانها خارجه عن طوع والدها وعليها العوده لبيت ابوها!!
يعني البنت لجأت للقضاء من اجل الحصول على حق مأخوذ منها والقضاء اعتبرها عاقه وعليها العوده الى ابوها لانه ادري بمصلحتها وهي خارجه عن طوعه اذن من الافضل انك تزيل القانون اللي بيعطيها الحق انها ترفع الولايه لانه البنت رح تكون في وجه كل قاضي انها عاقه والاب ما هو مش راضي يزوجها طمع بالراتب طيب البنت شو تعمل تلجأ للحرام وهون حضرة جناب القاضي رح يطلق لقب زانيه ولازم عليها الحد والجلد هاد اذا لحكت انها تعيش!!
طيب شو تعمل البنات اللي متلها وكيف تثبت حقها عمرها 40 وبدها تلحق تكون اسره والافندي رجعها لابوها واعتبرها عاقه يعني سؤال لمتى القانون السعودي رح يضل يعتمد على اجتهاد الاشخاص اللي بيحكموا في اغلب القضايا اعتمادا على العرف فقط لمتى!!

هناك 9 تعليقات:

" حبة عين السلط" يقول...

عالم غريب عجيب..ماذا تتوقعين منه اذا كان الجهل والتخلف مستوطنا فيه..
دمتِ بخير

Haitham هيثم Al-Sheeshany الشيشاني يقول...

طبعا ً شيء غريب و لا عدل و لا منطق فيه البتّة!

المرأة السعودية سمعنا أخبارها هنا و أزيد "ما خفي أعظم" ... العضل هنا شيء مستشر ٍ و هو كجبل جليد فعلا ً :(

أما شغلة "مسمّيين على بعض و همّ صغار" و شاكلتها فهو سخف مؤسف و هو للآن -للأسف- موجود! :(

**زمان عن مدونتك :) ... missing yr blog

marwa joe يقول...

ana he enda3'atet !! shoooooooo 5 sneen !!! ymma ejahel !! 2al wnas mn 200 saneh wslt 3l2mar !!

Whisper يقول...

عالم غريبة عجيبه
مش فاهمه ليش هيك صارت القصص زي ايام ستي و سيدي و حتى بوقتها كانو يستهجنوها

شو 5 سنوات وحكا بدي اخطب و بنت 4 سنوات لبسوها خاتم...انا اول شي خطرلي انها ممكن تحطه بتمها وهي بتلعب فيه :$

موضوع "سمر" البنت السعوديه هلأ كنت اقرأ عنها بمدونة صديقتنا وفاء و جد اشي ببصدم اللي صار واللي لسا بصير

http://musesephere.blogspot.com/2010/10/another-abused-saudi-woman-samar-badawi.html

sozan يقول...

اهلين حبة عين السلط:)
مثلما قلت عزيزتي ماذا اتوقع من الجاهل حينما يتصرف!!

sozan يقول...

اهلين هشام :)
وشكرا الك وزمان عن تعليقاتك:)
هي في العالم العربي فيها مشاكل عن جد محتاجه جرأه في الحل لانها عن جد تنم عن خلف بحت!!

sozan يقول...

اهلين مروى:)
وحياتك قمة الجهل !!

sozan يقول...

اهلين ويسبر:)
شو تلعب فيه ما هي امها حكتلها ماما لا تلعبي فيه لحد ماروحوا الناس والبنت هزت راسها!!
اما قصه الطبيبه الها الله هو اللي بيحل المشاكل كلها لانه النظام القضائي في السعوديه قائم على العرف اكثر منه على الاسلام!!

Haitham هيثم Al-Sheeshany الشيشاني يقول...

آه و الله زمان عنك يا "هشاااااااااام"

مين هشام :]]]]]]]]

]× O[