الجمعة، 24 يوليو 2009

افهموني !!

كتير لما باتصل في اهلي باشعر انه انا ارتكبت غلطه في زواجي والدتي بتصير تحكي لو اخذت فلان مش كان احسن بس راسك اليابس خلاكي تبعدي وتروحي على مكان ما فينا نشوفك ونشوف اولادك لكن ما حدا ينتبه الى الحقيقه انه انا سعيده في حياتي الزوجيه ممكن اكون تعبانه نفسيا انه انا انسانه عندها طموح عالي ويمكن هالطموح هو اللي تاعبني والاهم من هيك شعور والدي بالذنب لانه سمح بهالزواج وبيضل يحكي سامحيني يابا!!
بضل احكي نفس الكلمه انا اخذت القرار وانا بتحمل تبعات القرار بس انا وصراحه مبسوطه وباحلف مليون يمين انه انا مبسوطه انا ما بانتظر منهم انهم يتقبلوا الوضع وانهم يفهموا انه انا مبسوطه لانه في النهايه هاي سنة الحياة وكل انسان في النهايه لازمه يمشي في حياته وفي النهايه يعيش حياته وبكل ما فيها وانهم هم ما الهم ذنب وزواجي مش ذنب
مش عارفه لكن احيانا لما احكي مع اهلي بكون اطلب منهم الدعم لانه انا لحالي هون لكن حاليا بطلت احكي معهم كتير وصارت كلماتي منيحه, مبسوطه, ما في شي, ننزل لما الله يسرها, بيصير خير وكلها اجابات عائمه ومع ذلك مازلت اسمع نفس الكلام !!
الاهم من هيك والدتي اللي مش قادره تفهم انه انا حاليا مسؤوله عن عيله وانه انا هلا مسؤولياتي كبرت وما بقدر اساعد متل الاول الا انه مازالت بطالبني واحيانا بحس انه انا لازمني اطنش لانه انا مش مسؤوله عن شغلات كتير في حياتها لانها هي تعرف شو بتعمل وبتفكر وانا مش مسؤوله
يعني هلا لما زوجت اخوي اللي الله يهنيه لكن في شي مهم انه شخص عمره ما عرف شو معناة المسؤوليه ما بيقدر يحملها وحطت حالها تحت الدين من شان تزوجوا لانها بدها تحسسه انه ابوه عمل شي لاله لكن هاد غلط لانه والدي طول عمره يعمل لالنا يعني هلا لما كان حضرة جنابه يروح على الدروس الخصوصي في الثانويه العامه اللي ما واحد منا احنا اخوانه رحناها بالكم اللي هو راحها من وين اجت المصاري لهالدروس ؟ولما كان يدفع الرسوم من وين كان يدفعها ؟ ولما يمرض من وين كان يروح على الطبيب ؟ولما ولما!
لكن الشيء اللي انا تعملته في العلاقه بين اخوي ووالدي انه امي السبب لانه كانت تنظر لاخوي انه ضحيه والدي ومعاملته الا انه كان هو ضحيتها لانها تعاملت معه بطريقه خلته يحس انه والده ما عمل شي لاله وحسسته انه والده لازم يزوجه لانه ما عمل اله شي وهون حطت حالها تحت الدين وصارت طالبني في المساعده ...
انا بساعد لكن برضو ما بقدر اساعد بالكم اللي هي بدهياه لانه في النهايه اولادي وبيتي الهم الاوليه قبل الكل ولانه انا ما بقدر اساعد امي بتفكر انه زوجي ما بيحسن معاملتي وانه انا ما بمون على شي لكن الحقيقه مش هيك وحاولت افهم والدتي لكن لا حياة لمن تنادي ولهيك تعتبر انه زواجي غلطه

هناك 9 تعليقات:

Unknown يقول...
أزال المؤلف هذا التعليق.
غير معرف يقول...

مش هاممني الدنيا كلا وانت حدي
شو همي هن شو بدن بعرف شو بدي

الله يخليكي لزوجك ويخليلك ياه :)

اهم شي واللي انا مبسوطتلك كتير فيه , انك مقتنعة بيلي صح ,
سوزان انا متاكدي تماما انو امك كمان مش لاقيه حالها غلطانة ومقتنعه انو هاد اللي لازم يصير , من جهة اخوكي ونظرتها الك كواجب تساعديها

بس متل ما حكيتي , انتي الك عيلتك, وزوجك,والاهم انو مرجعك هلا صار الهم

يا ستي ديري بالك عليهم , والله يخليك لولو وعبودة :)

Whisper يقول...

بحس الاهل وخصوصا بس يكبرو بالعمر -الله يخليلنا اياهم - ببطلو يقدرو يستوعبو اي وجهه نظر او رأي غير اللي بفكرو فيه,وما بقتنعو باي شي عير اللي ببالهم.

اهم شي انك والحمد لله مبسوطه مع زوجك و اولادك, واجب ترضيهم بس مش على حسابك, فانتي اعملي اللي بتلاقيه مناسب و حاولي وازني ,بس المهم انت تكوني مرتاحه باي قرار بتعمليه

موفّقه ان شاء الله :)

غير معرف يقول...

I wish I have the gut to write like you in my blog. Eventhough, I am not using my real name yet I still find it difficult to be that honest and open about my life. I know writing and talking is the best medicine for sadness but I am not that brave.

sozan يقول...

اهلين ننوسه :)
الله يسعدك يا رب ويخليلك اهلك واحبابك باعرف بس احيانا الكلام اللي باحكوه بيتعب وهاد اللي تاعبني

sozan يقول...

اهلين ويسبر:)
انا بحاول اعمل اللي انا مرتاحه لاله لكن احيانا وهاد كتير منه انه اللي انت مرتاحه فيه بتلاقي كتار مش مرتاحين لاله
الله يوفقك

sozan يقول...

اهلين jaraad
هاد بييجي مع الوقت ورح تلاقي حالك تجاوزت هاد الخوف تمنياتي الك بتجاوز مرحلة الحزن اللي انت فيها

غير معرف يقول...

Mashallah its nice to hear of a happy marriage :) But I understand what you mean, that sometimes you want your family support... becuase things are not always 100% perfect, and you feel that you cant talk to your Mum about this... ya3ni mish 2aadri itnafsi 3an 9'o'3ootaat al-7ayaa al-3aadiya. Bas Yallah, Allah bi3eenik :) maaaybe at your next visit, if you feel u can, speak to ur mum openly, and maybe things can get better? i mean what r u going to do now? ur already married!

sozan يقول...

اهلين loolt
ان شاء الله بحاول انه افهم والدتي اللي بيصير وان شاء تتفهم واهلا سهلا فيك في مدونتي