الأربعاء، 27 أبريل 2011

فشة غل !!!!

من فتره احاول ان اتجاوز غضبي الا انني لم استطع سواء كان على الصعيد الشخصي او على الصعيد الانترنتي (حلوة هاي) فهيك رح تكون هاي التدوينه شرقيه غربيه شماليه جنوبيه وفي كل اتجاه له اسم وخاصه انه الجو كئيب كآبة لا توصف بتذكرني باغنيه حليم موعود!!!


هلا هدول اللي رافعين قضيه ضد اللي رسم الكاريكاتيرات يعني جد والله برافواااااا ما احنا ناقضنا هبايل!! يعني هلا البلد خليت ومش ضايل فيها ولا قضيه محرزه الا انه يرفعوا قضايا على صحافيين في بلاد عندهم شي بيحكوا له حرية رأي وهاي يا حبايبي الحريه الي ما الها حدود يعني بيرسموا النبي تبعهم وبتمسخروا على رجال الدين تبعينهم من شان الله افهموا وبطلوا هبل واشتغلوا في قضايا بتهم المواطن او الوطن او حتى الانسانيه ...يعني فقط للتذكير يعني تعرفوا على حدودنا الشماليه في بلد بيحكولها سوريا اسم الله عليكم والناس فيها بتموت شو رايكم يصير عندكم حبة دم مش كتير انا طالبه حبه وتروحوا تدفعوا قضيه ضد المتخلف ابن الجحش !!


اما الشي الثاني اللي تعبانه منه هو من فتره كنت عند ناس وبنحكي عن مشكله المسلمين في امريكا وعن المشكله اللي صادفتها مع المسجد طبعا ومن دون احم ولا دستور بتنط وحده وبتحكي ما هدول سلفيين !!!!!!


 يا حبيبي كمان الناس هون منقسمين الله لا يوفقكم على غباءكم يعني انا هلا نفسي افهم بيصير انه نجتمع تحت مسمى اني مسلم فقط وخلص انسى ولو لوهله انه فيه شيعي وسني ورافضي واباضي وعلوي وسلفي وجهادي وجهادي تكفيري واخواني ومسلم معتدل ومسلم مش طايق حاله والله اني قرفت من كتر التسميات نجحوا في وضع التقسيمات وعليها ضلينا وفرقتنا يعني هلا لو كل المسلمين في امريكا نسيوا حبه هالتقسيمات اعمالهم رح تكون اكثر تنسيق ورح نصير اقليه معترف بها وبحقوقها لكن طول ما احنا مش متفقين وقسمين حالنا في الخانات عمرنا ما رح نطلع بره الحانات !!


اما الشي الثالث هو الاردن من فتره وفيه ناس بتضل تسألني شو صاير في الاردن هل هي امان!! وعلى فكره هالناس فتحوا في راسي طاقه والاجابه كانت الاردن امان وما فيها شي وفيكي حبيبتي تزوري البلد وتنبسطي كمان .....طيب ليش ما تؤثروا في الثورات !!طيب انت بدك تزوري البلد ولا بدك تدرسي البلد فرقعتي مخي الله لا يفرقع مخ حدا !


طبعا اجابتي الاصلاح مش ضروري ييجي من خلال ثورات والملك نادى بالاصلاح من اول ما استلم لكن المشكله اللي عنا انه احنا ناس منتمين الى خانات فخذي يا حبيبتي سلفي وسلفي جهادي وسلفي جهادي تكفيري واخواني وبعدين فيه فلسطيني اردني واردني اردني وبعدين فيه موالي وغير موالي وبعدين فيه حركة جايين و24 آذار وبعدين في بلطجي واصلاحي وبالاخير فيه حكومه وشعب مش داري وين الله حاطهم بس لهيك احنا صرنا في واد والملك لله يطول في عمره في واد مش الله يعينه على هيك ناس !!!!


اما الشي الرابع هو انه الله لا يوفقك يا ابن الجحش على اللي تعمل فيه في العباد في سوريا عن جد اقلب الكندره على وجهها بيطلع الجحش لابوه !! يعني ما كفاك انه ابوك قتل الناس في حمص وحماه في الثمانينات انت جاي تعيد التاريخ مع ابن الحرام النجاد الله يحرقكم في نار جهنم والشي اللي بيعل ولا بلد عربي عندها الجرأة ان ترفض اللي بيصير يعني تمرجلوا على القذافي طيب وين المراجل مع الجحش ليش ما في  حتى ولو استنكار وين جيوش ملك السعوديه لتحمي الناس ...لحظه انا حكيت ناس ...هو بيحمي حدود بلاده مش بيحمي ناس!!
لا والمشكله المراجل تطلع لو حكى اوباما كلمة وبيصيروا يلوموا الناتو او يلوموا العالم الخارجي لانهم تاركين الناس تموت مش والله احترنا يا قرعه !!


والشي اللي بيعل والاخير ما هو انا لازم اكحلها صح ...صح هلا شو القصه مع اللي اسمه شاهين هلا هو اللي بس نهب البلد والكل بيضل يعيدوا ويزيدوا اي نعم هو حرامي وحرام الفرصه اللي صحتله لكن ما هم الحراميه الكبار مازالوا في البلد يعني بيمسكوا في الحرامي اللي سرق 100 الف و200 الف طيب وشو بيصير مع اللي بيسرق فوق المليون ودخل الوزارة وهو شحاد وطلع منها مليونير ممكن افهم !!!!!


اما على الصعيد الشخصي الجو كئيب مطر وغيوم وانا عندي حساسية الربيع وللي قاعده بتسوء يوم بعد يوم ! وكمان علشان تكمل الكيكه حماتي عندي وبدها ابنها يوصلها على كندا ويقعد معها يومين هناك وانا هون من الحساسيه ما باقدر اطلع بره يعني نفسي افهم الناس من وين تشتري الحظ علشان اروح اشتريه لاني والله تعبت !!

هناك 4 تعليقات:

yosef يقول...

صديقتي العزيزة سوزان

مساء الخير

ما تسمي بدنك بالمرة
الحال من بعضه
وما تشكيلي ببكيلك

ربنا يفرجها
اعملي زيّي لما بتقبع معي
بحط علي وبقعد بجنبه
وبشوف ضحكته
وبتهون عليّ الدنيا وصعابها

الله يخليلك عبودة ولولو
هما الحل...بعد العودة الى الله
والرجاء والسؤال منه
ان يفرج همنا
ويزيل عنا غمنا

دمتِ بخيّر

sozan يقول...

اهلين صديقنا يوسف :)
الله يخليلك علي وتضل ابتسامته منوره وجهه الحلو :)
هي سمة البدن تيجي للواحد وتطرق الباب لكن الحمدلله على كل شي عبوده ولولو بيخلوا الحياة اسهل واخف
اللهم فرج همنا وابعد عن التعب والمرض يارب!

sheeshany يقول...

الحال من بعضه زي ما كتب يوسف

إن شاء الله فشة الخلق تكون آتت ثمارها :)

sozan يقول...

اخف شوي والله يا هيثم والحمدلله على كل شيء :) سلملي ع الحبابه هيومه !!