السبت، 2 أبريل 2011

الله يرحم كروكت ستي!!

الله يرحمك يا كروكة سيتي طبعا اللي ما بيعرف شو مصطلح كروكه رح احكي اله :)
هاد في زماناته لما كان الناس رايقه وفاضيه وما كان عنا صحافه اصلا او لنحكي ما كانش حد يقرا واقصد من عامة الشعب لما كان العلم شيء فخرنوجي كان عند ستي جاجه والجاجه لما بتبيض بتصير تكاكي كتير فكانت ستي كل ما شافت حد بيحكي كتير وبيشبر وبيعرط كتير تحكي الله يرحمك يا كروكتنا !!
والسائل ليش يا حجه !!طبعا ستي عمرها ما راحت حج ...ستي هون بتحكي بترحم على الكروكه لانها لما كانت تكاكي كانت تبيض وتعطينا بيض يا اما ناكله يا اما نتركه ونخليه ليفقس ويصير صوص ويكبر بس انت وبلا مؤاخذه شو الفايده من كركك!!
طبعا اللي كان يكروك طول القعده يسكت لانه ما بده يصير اقل من جاجة ستي !!
وانا هون تذكرت كلمة ستي لاني والصلاة ع النبي شايفه الصحافه بدها ستي تذكرهم بكروكتها يعني اللي عنده كلمة منيحه يحكيها واللي ما عنده يجيب بيضه مسلوقه وياكله ويسكت اتهامات وتشكيكات وحكي فاضي ما اله داعي يعني ما شاء الله عليها الصحافه الاردنيه ابدعت ومن دون منازع !!
على فكره في صحفي والله العظيم مش متذكره اسمه في مره دخلت على موقع بيحكو اله جفرا نيوز والافندي كاتب مقال طويل عن المظاهره اللي صارت في دوار الداخليه لكن بطريقه اوجعت معدتي لشدة شو احكي يعني ذكاء يعني ما باعرف !!
لكن الاستاذ يعني حاطت اسمك ككاتب ومغلب الناس لتقرأ وفي الآخر مقاله يتمسخر على الناس اللي في المظاهره يعني في موقف ذكره قشعر بدني منه من كثر ما نيته واسعه مثل امانة العاصمه المهم الافندي بيحكي انه قرب من بنت فبيسأل البنت انت ليش هون؟ البنت تحكي انت سحفي وهي هيك كتبها وهو بيعلل انه من الممكن البنت خربطت بينه وبين الخالدي فهو حكالها آه انا سحفي من رويترز فالبنت تحكي اله احنا بدنا هيك وبدنا هيك انا مش متذكره وبيسترسل الصحفي وبيحكي انه شاف شب رابط شعره لوراه وبيحكي حكي عنه بطريقه مقرفه يعني وبالمشرمحي الافندي ما وجد اي شي يحكي فيه عن المتظاهرين الا اللهجه والمنظر ما انتقدهم لشعار اطلقوه او لتصرف غير حضاري !!
هلا انا بدي احكي للصحفي المحترم وانا احتراما يعني للانسانيه رح احكي اولا لا يحق الك انك تتمسخر على لهجه لان من الممكن الآنسه اللي انت حكيت معها تكون والدتها شاميه او يا  سيدي ولا تزعل فلسطينيه مدنيه علشان اشبع ذكاءك اللي عن جد لا يطاق ولا يحق الك انك تحكي عن الشب وتلمح انه شاذ لانه فقط شعره طويل خليني اذكرك شوي اذا كانت اصولك بدويه انا لا اعرف انه الرسول عليه الصلاة والسلام كان له جدايل وشعره طويل فهل هذا يعني انه الرسول فيه خلل ايها الصحفي الكريم !!
مختصر الكلام ان كان فيه كلمة تطيب جرح اللي خلقه امثالك بين افراد الشعب الاردني بكل اطيافه احكيها والك حبة ملبس وشكر بس اذا ما عندك وبدور على جمر لتنفث عليه نيران كرهك فانا باحكيلك عيرنا سكوتك والنبي يا شيخ لانه جد قرفتونا !!

هناك 6 تعليقات:

Whisper يقول...

هلأ مثل هيك مقال بجيب 1500 تعليق من هالعالم الفاضيه اللي بس متخبيه ورا هالشاشه ونازله تنظر و تخوّن و تسب عالعالم, لانه بتفكيرها السطحي هيك بصيرو و بثبتو انهم رجال, وبنزلو تمجيد بهاللي كتب المقال

فهيك شخص وبجيب هيك تعليقات فهو اكيد كاتب....الله يسامحك يا سوزان طبعا كاتب

كثرو كتّابنا من هالنوعيات :$

sozan يقول...

آه كاتب لانه من الفعل كتب لكن مش كاتب صحفي !
اهلين ويسبر ان شاء الله صرت منيحه هلا:)

Whisper يقول...

الحمد لله كتيييييير منيحه...هالدوا زي السحر

بس هلأ لما ماما تشوف انه اذن الفجر ولساتني صاحيه الله اعلم شو يصير :$

sozan يقول...

هههههه الله يخليها يا رب نعمه الواحد انه يشوف اهله ويقاتلوا عليه ترى كله من الحب الله يخليهم النا يا رب

sheeshany يقول...

غيرانة لأنك مش كاتبة و مش صحفية؟ :]]]

الله بعين يا سوزان

قرفونا بالفعل!

sozan يقول...

والله العظيم اني مش غيرانه جاي ع بالي اعمل شي تاني بهالمخلوقات الفطريه !!
اهلين هيثم:)