الأربعاء، 16 مارس، 2011

انا يطلع لي كلب !!


بعيدا عن جو الجديه السائد في مدوتني ونتيجه لقراءتي لمدونة ويسبر وتذكرت موقف صار معي في ايام الجامعه حبيت احكيه لكن رجاءا ما حدا يحكيه لحدا خليه سر:)
هاد يا صاحبين السلامه ومن غير طولة سيره في يوم كان عندي محاضره على ال8 صباحا -كنت احقد على كل دكتور حاطت محاضراته الساعه 8 - وعلى هيك وجب على حضرتي اني اصحى قبل الشحاده وبنتها واطلع قبل ما تطلع الشمس بلا طولت سيره طلعت وامشيت وكل يوم انا باحكي يا رب يكون في ناس في الشارع على الرغم انه بيتنا كان على شارع رئيسي !!
فامشيت وطلع الي الكلب اللهم صلي ع النبي وانا باحكي بيني وبين حالي هدي يا بنت لا تخافي اخوي حكالي لا تهربي بس انا كنت عارفه انه في كلاب سعرانه في المنطقه فيعني شوف درجة الخوف !!
فواقفه والكلب واقف باطلع فيه وبيطلع فيي صرت احكي ياعمي الدكتور ما راح يفهم انه كلب اخرني عن الجامعه وما باعرف ليش ساعتها تذكرت تبليمه عادل امام في شاهد ما شفش حاجه ومش عارفه شو صار فيي من الخوف صرت احكي للكلب ولك امشي والكلب الحقير بيجحر في كانه بيحكي لي مش ماشي شو بدك تعملي فقررت اني اركض يا حبيبي واتاري الواحد وهو خايف بيركض زي الصاروخ !!
وبلشت اركض بحركة زيك زاك في الشارع كل ما اشوف سياره امر قدامها يعني شوف الشجاعه مش خايفه من سيارة تدهسني بس خايفه من كلب !!
لحد ما وصلت السرفيس فتحت الباب ونطيت جوا الزلمه كنه كان غافي بيحكي لي شوفي يا عمي حدا بيركض وراكي !!انا حكاتله لا ياعمي بس كلب طلع فيي نص تطليعه وحاكى لا تركضي يا عمي الكلب بيحس عليكي قلت عمو الكلب ما عنده محاضره ع ال8 في اربد ودكتور اذا تأخرت دقيقه يحكيلك بره انا عندي !!

هناك 8 تعليقات:

Saleh يقول...

و إللي مرة هاجموه "شلية" (مجموعة) كلاب في منطقة شبه مهجورة...

sozan يقول...

لا حول الله يا رب هاي كان ع طول صابتني سكته من وراها انا كلب وصرت احكي تركي لو شليه بيغمى علي !!
اهلين صالح :)

Whisper يقول...

تنذكر ما تعاد يا رب

بخوفي يا اختي ولا اليف و لا كيوت ولا بطيخ... خايفه طبيعي تركضي وبدون تفكير :(

sozan يقول...

لا شو ما تنعاد ما هون بانزعجه لما تخافي من الكلب لهيك انا هلا ما بهرب بس بتصيبني حالة كهربا بس:)

Haitham هيثم Al-Sheeshany الشيشاني يقول...

ذكرياااااااااااااااااات مخيفة!
:(

بكره الحيوانات أنا

sozan يقول...

متلي انااااااااااااااا:)

jafra يقول...

انا شخصيا بحب الحيوانات و ما بخاف منهم
هادا كان شعوري لدرست سنة بالتكنو و فهمت شو يعني كلب بيجحر
شو كان في هناك كلاب على طريق السكن لمبنى c
اشي بخوف
في عندي اخت كتير بتخاف من الكلاب و الله وكيلك كل ما تشوف كلب لا شعوريا و دون عن كل هالبشر بلحقها
عن جد الكلاب بتحس
بس من غير زعل
كتير ضحكت على قصة الركض
...مش قادرة اتخيلها ابدا

وجع البنفسج يقول...

اختي سوزان ..

يسعدني الوصول لمدونتك عبر مدونة الاخ هيثم .. بمناسبة الحديث المشترك عن الكلاب ..
انا باخاف كثير من الكلاب وحتى من مجرد سماع صوتهم والحمدلله ماليش تجارب سابقة معهم ..ربنا يبعد شرهم عنا ويخلي كلامنا خفيف عليهم ..

تقبلي مروري وخالص تحيتي..